ანრი ჯოხაძეს სტუდია “უნივერსალში” (გიგა კვენეტაძის ყოფილი სტუდია “ორფეი”) ვეწვიეთ, სადაც ის ალბომისთვის ახალ სიმღერებზე აქტიურად მუშაობდა. ამ ალბომში მისივე თქმით 14-15 სიმღერა შევა. მათ შორის, საკუთარ სიმღერებთან ერთად იქნება ანრის დედის და ლილიკო ნემსაძის სიმღერა.
- ახალ სიმღერებზე კლიპის გადაღებებს და შესაბამისად ჩვეულ სკანდალებს ხომ არ გეგმავ?
- გაშიშვლებას აღარ ვაპირებ, (იცინის) სკანდალებს რაც შეეხება რათქმაუნდა. უსკანდალოდ ანრი ჯოხაძე წარმოუდგენელია, მაგრამ ახლა უფრო სხვანაირად გავაკვირვებ საზოგადოებას, შოკშიც ჩავარდება ალბათ ბევრი. სკანდალი ხმამაღალი ნათქვამია, სკანდალი არ იქნება, უბრალოდ ძალიან გაუკვირდება საზოგადოებას, ეს არ იქნება ეროტიკული, არც სასიყვარულო დრამა და შესაძლოა ყველაზე სერიოზული ნამუშევარი იყოს ქართულ შოუ-ბიზნესში. ბევრი კი არ გაოცდება საზოგადოებაში, - უბრალოდ დაიშოკება. ყველას მოეწონება და ბევრი იტირებს ზუსტად ვიცი.
- ანუ სიმღერა ყველა ასაკის მსმენელისთვის არის გათვლილი?
- კი, შეგნებული ადამიანი შეიძლება 4-5 წლისაც იყოს და ესმოდეს რაღაც, იქიდან დაწყებული აბსოლუტურად ყველას მოეწონება.
- კლიპს ისევ ანი მაღლაკელიძე გადაიღებს?
- არ გამოვრიცხავ.
- როდისთვის იქნება კლიპი მზად?
- გაზაფხულისთვის. ვცდილობ, რომ ეს პროცედურა დავაჩქარო.
- შენი ობიექტური შეხედულება როგორია, ვინ უნდა წარადგინოს საქართველო ევროვიზიაზე?
- თუ ჩვენ გვინდა, რომ ევროვიზიაზე წარმატებას მივაღწიოთ ჩვენგან უნდა წავიდეს დიანა ღურწკაია. ინტუიცია არასოდეს არ მღალატობს, იმიტომ რომ გამოცდილება მაქვს ძალიან დიდი. სოფო ხალვაშიც რომ მიდიოდა, მაშინაც ვთვლიდი ათეულში გასვლაც დიდი წარმატება იქნებოდა, არა, იმიტომ, რომ სოფო ცუდი მომღერალია, არამედ პროდუქცია არ იყო სწორად მიწოდებული. წელს კარგები არიან სალომე გასვიანი, თიკა ფაცაცია, “სამი გოგოს” პროექტი, მაგრამ დიანა ღურწკაიას აქვს საუკეთესო სიმღერა და პოპულარული ქალია მთელს რუსეთში.
- ანრი რატომ შემორჩი საქართველოში აქამდე და რატომ არ ხარ უკვე საზღვარგარეთ?
- პირველ რიგში შემოვრჩი იმიტომ, რომ საპრეზიდენტო არჩევნები ჩავათავეთ. უკრაინაში წავალ, ოღონდ 1-2 თვეში, უფრო საფუძვლიანად მოვემზადები, თორემ ჩახვიდე, კონცერტი ჩაატარო, ჰონორარი აიღო და დაბრუნდე, არაფრის მომცემია. ალბათ არავინ შემეკამათება, რომ მსმენელთა პატარა კონტიგენტი გვყავს საქართველოში და აქედან გამომდინარე დიდ ფულს ვერ იშოვი. როცა მომეცემა შანსი სადმე ფეხი უფრო რეალურად მოვიკიდო, არც დავფიქრდები. ვხედავთ რომ, თუნდაც მეზობელ ქვეყანაში ქართველი შემოქმედები ძალიან კარგად არიან.
- თუ გიცდია თუნდაც მოსკოვში ფეხის მოკიდება?
- მოსკოვში არა, აი კიევში მიცდია, მაგრამ ჩემი პრობლემების გამო ცოტა ჩამოვრჩი სიტუაციას.
- შენი პოლიტიკური შეხედულება როგორია? სააკაშვილის მხარდამჭერ საკონცერტო ტურნეებში იღებდი მონაწილეობას, მართლა მარტო შემოქმედებითი იყო ეს, კომერციულთან ერთად თუ?
- რეალურად თუ შევხედავთ, რათქმაუნდა, რომ არ მქონდეს ჩემი გარკვეული სიმპატია სააკაშვილის მიმართ ვერანაირი ჰონორარი ვერ მომხიბლავდა. თან უნდა გავითვალისწინოთ, რომ სააკაშვილი ერთადერთი კანდიდატი იყო, რომელსაც საკონცერტო ტურნეები ჰქონდა და ჩემი ყველა კოლეგა აქ იყო. მეც საითაც რეალურად გამიწია გულმა იქ ვიყავი.
- შენი სტუდენტობა გაიხსენე, რა გაქვს დამთავრებული?
- დავამთავრე ხელოვნების აკადემია, ვოკალური განხრით. ჩემს დროს ძალიან ცუდი პერიოდი იყო და არ იყო გართობის საშუალებები. იყო “გპი”-ს კლუბი, ასევე ივერიის ქვეშ კლუბი და კაფე “ნარგიზი”. (იცინის).
 ყმაწვილობის პერიოდში მე უფრო საკუთარ თავზე ვმუშაობდი, დღეს რომ ეს შედეგი მიმეღო.
- რა პროფესის არ იქნებოდი არასოდეს?
- “სუტინიორი” ვერ ვიქნებოდი, ასევე “ბარიგა” ვერ ვიქნებოდი.
- სტუდენტობის გამოკვეთილ მინუსებზე და პლიუსებზე რას იტყვი?
- შეიძლება ვცდები, მაგრამ, მე მგონია, რომ ზოგადად ინტერესმოკლებულები არიან, მიზანდასახულობა და მიზანმიმართულობა აკლით. ადამიანს რაღაც უნდა აინტერესებდეს, ან მუსიკა ან სპორტი, წიგნზე აღარაფერს ვამბობ, წიგნი ჩემს თაობაში მოკვდა. ეს მშობლების ბრალია. ნაკლებად დადგნენ სარკის წინ, განსაკუთრებით დედები და მიხედონ შვილებს.
- ახალგაზრდობის მუსიკალურ გემოვნებას როგორ შეაფასებ?
- ძალიან კარგად. თუნდაც იმიტომ, რომ ანრი ჯოხაძე დღეს პოპულარულია. ეს მათი დამსახურებაა (იცინის)
- რას უსურვებ ჩვენს მკითხველს?
- მეც ვიყავი მაგათ ასაკში და სისხლი მარტყამდა თავში. მესმის მათი და ვუსურვებდი, რომ უფრო მეტად მიმტევებლები ყოფილიყვნენ და რაიმე შეცდომა არ დაუშვან ცხოვრებაში ისეთი, რომელსაც ვერასოდეს გამოასწორებენ. იმიტომ რომ, ეს არის ასაკი ტემპერამენტის, ეს არის ასაკი ქარაფშუტობის და ბევრ შეცდომას ადამიანი სწორედ ამ პერიოდში, თინეიჯერობის ასაკში უშვებს. მერე კი - უკვე ვღვინდებით..